"AMAY Abdullanın məhkəməsi davam edəcək
Ticarət mərkəzinin həbsdə olan sahibi: "Günahım varsa, 140 il də yataram"
Bakı Ağır Cinayətlər Məhkəməsində "AMAY" ticarət mərkəzinin həbsdə olan sahibi Abdulla Abdullayev, habelə, Heydər Rzayev, Mehman Məmmədxanlı, Elşən Novruzov, Vidadi Qurbanov və Nadejda İlyasovanın barəsində olan cinayət işi üzrə növbəti məhkəmə prosesi keçirilib.
Hakim Əfqan Hacıyevin sədrliyi ilə keçirilən prosesdə təqsirləndirilən şəxslərin vəkilləri vəsatətlə çıxış ediblər. Vəkil Əkbər Bağırov vəsatət qaldıraraq təqsirləndirilən şəxs barəsində həbs-qətimkan tədbirinin dəyişdirilməsini, zərərçəkmiş şəxslərin statusunun ləğv edilməsini məhkəmədən xahiş edib.
Vəkil Osman Kazımov vəsatət qaldıraraq, mülki xarakterli işə görə vətəndaşı həbsdə saxlamaq qanunsuz olduğunu bildirib. Dövlət ittihamçısı Fərid Nağıyev həbs-qətimkan tədbirinin dəyişdirilməsinə əsas görmədiyini deyib.
Vəsatətlər təmin olmayıb. Abdulla Abdullayev qısa çıxış edib. ""Birlikbank"ın 20 min kvadratmetrlik mülkiyyəti var. Girov da qoyulub, pul da ödənilib. Yalnız məni tutmusuz. Bəs o həbs olunan 43 nəfərdən niyə ala bilmirsiniz? Mən hələ sakitəm. Amma elə düşünməyin sakit qalacağam. Mənim hüquqlarımı pozmusuz. 14 aydır içəridəyəm. Günahım olsa, 140 il də oturaram"
Bununla da məhkəmə prosesi mayın 29-dək təxirə salındı.
Qeyd edək ki, Abdulla Abdullayev və digərləri Cinayət Məcəlləsinin 179.3.2 (mənimsəmə və ya israf etmə) və 308.2-ci (vəzifə səlahiyyətlərindən sui-istifadə) maddələri ilə təqsirləndirilir.
Təqsirləndirilən şəxslərdən yalnız A.Abdullayev barəsində həbs-qətimkan tədbiri seçilib, digər şəxslər isə zamindədirlər.
A.Abdullayev ötən il aprelin 4-də həbs olunub. Onunla bağlı İqtisadiyyat və Sənaye Nazirliyi yanında Sahibkarlığa Kömək Milli Fondundan daxil olmuş material Baş Prokuror yanında Korrupsiyaya Qarşı Mübarizə Baş İdarəsində araşdırılıb.
A.Abdullayevin həbsi ilə bağlı Baş Prokurorluğun mətbuat xidmətinin zamanında yaydığı məlumata görə, ilkin araşdırma zamanı toplanmış sübutlar əsasında Cinayət Məcəlləsinin 179.3.2 (mənimsəmə və ya israf etmə) və 308.2-ci (vəzifə səlahiyyətlərindən sui-istifadə) maddələri ilə cinayət işi başlanıb.
İstintaq müəyyən edib ki, 2006-2008-ci illərdə "Birlikbank" ASC-nin Müşahidə Şurasının sədri işləmiş Abdulla Abdullayev vəzifə səlahiyyətlərindən sui-istifadə etməklə Sahibkarlığa Kömək Milli Fondunun xətti ilə kənd təsərrüfatı, eləcə də digər sahələrin inkişafına yönəldilməsi nəzərdə tutulan ümumilikdə 3 milyon 397 min manat məbləğində vəsaiti təyinatı üzrə istifadə etməyib.
İstintaqın gəldiyi qənaətə görə, vəsaiti ayrı-ayrı hüquqi şəxslərin müvəkkil bank olan "Birlikbank" ASC-də açdırdığı hesablaşma hesablarına köçürülməklə həmin vəsaiti faktiki rəhbəri olduğu "A.M.A.Y" MMC-nin Xətai rayonu ərazisində yerləşən binasının təmir-tikinti işlərinə xərcləyib. Özgənin külli miqdarda əmlakını mənimsəməsində şübhələr üçün ciddi əsaslar olduğundan A.Abdullayevə Cinayət Məcəlləsinin qeyd olunan maddələri üzrə ittiham elan edilib və barəsində məhkəmənin qərarı ilə həbs-qətimkan tədbiri seçilib.
.jpg)
