Xarici İşlər Nazirliyindən sərt mövqe: ATƏT-in ikili standartlara yol
verməsi münaqişələrin yenidən alovlanması riskini doğurur
Rəsmi Bakı ilə Azərbaycana qarşı ikili standartlarla davranan Avropa qurumları arasındakı "soyuq müharibə" özünün pik nöqtəsinə çatıb. Bununla bağlı ölkə prezidenti İlham Əliyevin məlum açıqlamalarından sonra, Azərbaycan Xarici İşlər Nazirliyi də hərəkətə keçərək sərt bəyanata imza atdı.
Belə ki, Azərbaycan Xarici İşlər Nazirliyinin (XİN) mətbuat xidmətinin Helsinki Yekun Aktının 40 illiyi ilə bağlı 10 iyul 2015-ci il tarixində Helsinkidə keçirilmiş ATƏT-in yüksək səviyyəli qeyri-rəsmi görüşünə dair mətbuata açıqlama yayıb. XİN-in mətbuat xidmətindən mətbuata daxil olan məlumatda bildirilir ki, 10 iyulda Helsinki şəhərində Helsinki Yekun Aktının imzalanmasının 40 illiyi münasibətilə ATƏT-in qeyri-rəsmi yüksək səviyyəli görüşü keçirilib. Tədbirdə Azərbaycan Respublikasının Xarici İşlər Nazirliyinin yüksək səviyyəli nümayəndə heyəti iştirak edib.
Tədbirdə çıxış edən Azərbaycan nümayəndə heyəti toplantı iştirakçılarının diqqətini ATƏT məkanındakı həll olunmamış münaqişələrə çəkərək, Helsinki Yekun Aktında təsbit olunmuş dövlətlərarası münasibətlərin prinsiplərinin açıq şəkildə pozulması ilə müşayiət olunan bu münaqişələrin Avropa təhlükəsizlik sistemində müşahidə olunan böhranın kökündə dayandığını və bu münaqişələrin son 25 il ərzində həll edilməmiş qalmasının bütövlükdə ATƏT regionunda sülh və təhlükəsizlik üçün ən ciddi hədə olduğunu vurğulayıb. Nümayəndə heyəti tərəfindən qeyd edilib ki, Helsinki Prinsiplərinin və ATƏT-in digər öhdəliklərinin iştirakçı dövlətlər tərəfindən təhrif edilməsi, onların tətbiqində selektiv yanaşmaya və ikili standartlara yol verilməsi ATƏT məkanında qeyri-sabitliyin yaranmasına səbəb olur, eləcə də mövcud münaqişələrin nizama salınması proseslərində durğunluğa gətirib çıxarmaqla, onların yenidən alovlanması riskini doğurur.
Xüsusilə, xalqların bərabər hüquqluluğu və öz müqəddəratını təyin etmə hüququnun bəzi ATƏT iştirakçı dövlətləri tərəfindən özlərinin qeyri-qanuni əməllərini, o cümlədən dövlətlərin ərazi bütövlüyü və siyasi müstəqilliyinə qarşı güc tətbiq etmə və ya güclə hədələmə, gücdən istifadə etməklə ərazilərin ilhaqı və əhalinin zorla öz doğma yurdlarından qovulması kimi beynəlxalq hüquqa zidd hərəkətləri ört-basdır etmək məqsədilə təhrif edilməsinin münaqişələri doğurduğu və onların həlli yolunda ciddi əngəl olduğu qeyd edilib.
Bu xüsus da, bir təşkilat kimi ATƏT-in fəaliyyətinin əsasını təşkil edən prinsiplərə hər hansı selektiv yanaşma və ikili standart olmadan əməl edilməsinin təmini istiqamətində fəaliyyətinin gücləndirilməsinin münaqişələrin həlli prosesinə töhfə verə biləcəyi vurğulanıb.
Toplantıda çıxış edən iştirakçı dövlətlərin mütləq əksəriyyəti tərəfindən Helsinki Yekun Aktının dövlətlərarası münasibətlər kontekstində öz əhəmiyyətini qoruyub saxladığı və Avropa təhlükəsizliyi sistemində mövcud böhrandan çıxış yolunun yalnız Helsinki Dekaloquna qeyd-şərtsiz əməl edilməsindən ibarət olduğu ifadə edilib. Bu müstəvidə dövlətlərin ərazi bütövlüyü və suverenliyinə hörmət, beynəlxalq səviyyədə tanınmış sərhədlərin toxunulmazlığının xüsusi əhəmiyyət kəsb etdiyi və münaqişələrin həlli istiqamətində səylərin intensivləşdirilməsinin vacib olduğu bildirilib.
Göründüyü kimi, artıq rəsmi Bakı Avropanın ölkəmizə qarşı ikili standartlarına dözmək niyyəti yoxdur və bunu hər fürsətdə ifadə edir. Bu isə Azərbaycanın haqlı mövqeyini ifadə etməklə həm də ölkəmizin heç kimdən asılı olmadan müstəqil siyasət kursu yürütməsinin bariz göstəricisidir. Ölkəmizin hərbi potensialının son illər ərzində əhəmiyyətli şəkildə artması isə Azərbaycanla Ermənistan arasında hərbi əməliyyatların başlayacağı təqdirdə Bakının qələbəsini şərtləndirən faktordur. İstər Avropa, istərsə də digər bölgə dövlətləri isə dəfələrlə rəsmi Bakını hərbi yola əl atmamağa dəvət edib. Azərbaycan XİN-in son bəyanatı isə ölkəmizin işğal edilmiş torpaqların itkisiylə barışmayacağını göstərir. Hər halda Bakının bu müharibə xəbərdarlığı təkcə Ermənistanda deyil, bütün Avropa düşərgəsində ciddi əndişələr yaradacağı şübhəsizdir.
Elvin
.jpg "Nazir Ağdaşda şəhid ailəsini ziyarət edib")
