London Universitetinin professoru Edrian Çeokun rəhbərlik etdiyi alimlər qrupu tərəfindən ərzaqların dadını dəyişə bilən "ağıllı çəngəl - cihaz hazırlanıb. "Taste Buddy adlı bu cihazın yaradılmasının əsas məqsədi qidaların insan üçün daha sağlam olmasını təmin etməkdir.

Unikal.org-un məlumatına görə,  Azərtac xarici saytlara istinadla xəbər verir ki, qidalara zəif elektrik cərəyanı ötürərək çalışan cihaz insan orqanizmi üçün tamamilə təhlükəsizdir. Ağızda olan reseptorlar da ona qarşı həssasdırlar. Belə ki, çəngəl qidanın daha şirin və ya daha duzlu dad verməsini təmin edə bilir. Mütəxəssislər ilıq qidalarda şirin dadın soyuq qidalara nisbətən daha çox hiss olunduğunu təyin ediblər. Buna görə də çəngəl 40 dərəcəyə qədər qıza bilir.

Cihazın işlək prototipi ilk dəfə İngiltərənin Birmingham şəhərində keçirilmiş "The Big Bang UK yarmarkasında təqdim olunub. Bu yeni növ çəngəli sınaqdan keçirənlər duz və şəkərdən daha az istifadə edirlər. Bu isə həzm və ürək-damar sisteminin fəaliyyətinə müsbət təsir edərək çəkinin azalmasına imkan yaradır.

Cihazın hazırlanma səbəbini açıqlayan Edrian Çeok deyib: "Çəngəl maraqlı bir təcrübə üçün hazırlanmışdı. Daha sonra o, böyük potensialı olan bir layihəyə çevrildi. Bu texnologiyanı təkcə çəngəldə reallaşdırmaq şərt deyil. Əşyanın formasının heç bir önəmi yoxdur. Gələcəkdə hətta dad dəyişən qaşıqların və fincanların da hazırlanması planlaşdırılır. Bu texnologiyanın təkmilləşdirilməsi dad dəyişilməsinə daha kəskin təsir etməyə imkan verəcək. Məsələn, insanlar tərəvəzlərin dadını şokolada çevirə biləcəklər.