Bir neçə gündür sosial şəbəkələrdə yer alan video insanların müzakirə mərkəzinə çevrilib.
Unikal.org ANS PRESS-ə istinadən verdiyi məlumata görə, videoda broyler toyuğu məlum olmayan məhlula salınır və nəticədə toyuq köpüklü plastik kütləyə çevrilir. Videoda danışan şəxs bildirir ki, o, toyuğu ozonator aparatına salır və nəticədə əriyərək, rezinəbənzər hala düşür. Görüntüdə o da qeyd olunur ki, insanlarda xərçəng xəstəliyinin başlıca əmələgəlmə səbəbi də elə məhz budur.

Biz də məsələni daha dərindən araşdırmaq üçün mütəxəssislərlə əlaqə saxladıq. Azad İstehlahçılar Birliyinin sədri Eyyub Hüseynovun sözlərinə görə, videonu çəkib paylaşan şəxsin məqsədinin nə olduğu bəlli deyil: "Videoya mən də baxmışam, amma heç nə anlamıram. Elə maddə var ki, onu istənilən məhsulun üzərinə tökəndə o, məhsulu köpük halına salır. Məsələn, sulfat turşusunu ətin üzərinə töksək, və ya çörəyin üzərinə töksək, ona oxşar vəziyyət alınar. Həmin görüntünü çəkənlər, görünür ki, toyuq istehsalına zərbə vurmaq istəyirlər".

O, həmçinin, əlavə etdi ki, ölkəmizdə broyler toyuğunun insan orqanizminə heç bir ziyanı yoxdur. Hər gün yeyməmək şərti ilə.

 

Dövlət Baytarlıq Xətbuat xidmətinin rəhbəri Yolçu Xanvəli deyir ki, həmin insanlar Baytarlıq Xidmətinə müraciət etsinlər və məsələyə birgə baxılsın. Rəhbərin sözünə əsasən, bu prosesi izləmədən konkret bir söz demək olmaz.

Azərbaycan Milli Kulinariya Mərkəzinin (MKM) pezidenti Tahir Əmiraslanov videoda xərçəng xəstəliyi ilə bağlı deyilənlərlə razılaşmadı: "Ozonotor ziyanlı deyil, ona, nəinki, broyler, adi kənd çolpası, ət salınsa, yenə o həmin məhsulları təmizləyəcək. Amma yenə də bunu araşdırmaq üçün laboratoriyadan keçirmək lazımdır".
 
 
Ümumiyyətlə, zaman-zaman genetik modifikasiya olunmuş (GMO) məhsulların müxtəlif xəstəliklər yaratması və Azərbaycan bazarlarına yol açması müzakirə məsələsi olub. Broyler toyuqları da genetik modifikasiya olunmuş (GMO) qida növü hesab olduğundan, bu toyuqlar da aldığı qida maddələrinin hamısını ətə çevirirlər.
 

Toyuq təbii yolla 12-16 həftəyə böyüməlidirsə, fabrikdə 5 həftə ərzində 1 kilodan çox çəkiyə sahib olur. Azərbaycanın broyler müəssisələrini fərqləndirən bir cəhət də odur ki, toyuq 40 gündən tez kəsilmir. Toyuqlar kəsilən kimi 20 dərəcədə dondurulur. Buna şoklama deyilir. Bu zaman heç bir keyfiyyət fərqi baş vermir.

Bir sıra xarici ölkələrdə, o cümlədən, Rusiya və Türkiyədə də broyler toyuqları barədə dəfələrlə məlumatlar yazılıb. Həmin mənbələrdə bildirilir ki, broyler toyuqlarının yeminə antibiotik və hormonal preparatların qatılması onların ətlənməsinə və müxtəlif xəstəliklərdən müdafiə olunmasına xidmət edir. Elə bu səbəbdən də əhali arasında kökəlmə, onurğa sütunu yırtığı, şəkərli diabet, mədə-bağırsaq problemləri, sümük boşluğu, xərçəng və digər xəstəliklər çoxalır.

Yuxarıda yazılanlardan aydın olur, hər bir insanın sağlamlığı öz əlindədir. Əgər kimsə, sağlam qalmaq və sağlam qida ilə qidalanmaq istəyirsə, o zaman genetik modifikasiya olunmuş məhsullardan imtina edərək, təbii ərzaq və ət məhsullarına üz tutmalıdırlar. Bundan başqa isə genetik modifikasiya olunmuş məhsullar satışa çıxmazdan öncə aidiyyatı qurumlar tərəfindən nəzarətdən keçirilməlidirlər.