"Dövlət Komitəsi təzə yarananda bir çox insanlar sona qədər gender məsələsini dərk etmirdilər".

Unikal.org-un məlumatına görə, bunu bu gün "Gənclər təşkilatları Dayanıqlı İnkişaf Məqsədləri naminə" mövzusunda konfransda Ailə, Qadın və Uşaq Problemləri üzrə Dövlət Komitəsinin sədri Hicran Hüseynova bildirib.

Dövlət Komitəsinin sədri deyib ki, qadın və qızların cəmiyyətdə xüsusi yer tutması vacibdir: “Əhalinin yarısını qadınlar təşkil edir. Əgər qadınlar cəmiyyətin və dövlətin inkişafında iştirak etməsə, hansı inkişafdan söhbət etmək olar?  Araşdırmalar göstərib ki, qadınların rəhbərlikdə çox olduğu ölkələr daha artıq inkişaf edib. Elə sahələr var ki, qadınlar kişilərdən daha çoxdur. Məsələn, təhsil, səhiyyə və mədəniyyət sahələrində qadınlar daha çoxdur. Amma bu sahələrdə yüksək vəzifələrdə kişilər çoxluq təşkil edir. Bu da qadınlar arasında özünəinam hissini azaldır. Çünki qadınlar öz potensiallarına inanmırlar. İlk bələdiyyə seçkilərində seçilən bələdiyyə üzvlərinin cəmi 4 faizi qadın idi, sonra bu rəqəm 30 faizə çatdı".

Dövlət Komitəsinin sədri Azərbaycan cəmiyyətində qadınların, o cümlədən gənc qızların xüsusi yer tutmasını arzuladığını söyləyib: “Çünki əhalinin yarısını qadın cinsinin nümayəndələri təşkil edir və qadınlar ölkədə baş verən bəzi proseslərdə iştirak etməsələr, hansı inkişafdan söhbət gedə bilər?! Gender anlayışı təkcə Azərbaycanda deyil, eləcə də dünyanın bəzi ölkələrində də düzgün başa düşülmür".