15 Oktyabr 2019
Rövşən Rzayev Ağdamda məcburi köçkünləri qəbul edib - FOTO
Rövşən Rzayev  Ağdamda məcburi köçkünləri qəbul edib -FOTO CƏMİYYƏT 19:03 2019-09-20

Azərbaycan Respublikasının Prezidenti İlham Əliyevin tapşırığına əsasən, mərkəzi icra hakimiyyəti orqanları rəhbərlərinin şəhər və rayonlarda vətəndaşların qəbulu cədvəlinə uyğun olaraq, Qaçqınların və Məcburi Köçkünlərin İşləri üzrə Dövlət Komitəsinin sədri Rövşən Rzayev sentyabrın 20-də Ağdam rayonunda məcburi köçkünləri qəbul edib.

Unikal.org xəbər verir ki, qəbulda Ağdamda müvəqqəti məskunlaşmış 115 nəfər məcburi köçkün iştirak edib.
Müraciətlər, əsasən, dövlət mənzil fonduna məxsus xüsusi təyinatlı yaşayış sahələrinin verilməsi, vahid aylıq müavinətin təyin edilməsi və məşğulluq məsələləri ilə bağlı olub. Vətəndaşlara məlumat verilib ki, Prezident İlham Əliyev məcburi köçkünlərin sosial müdafiəsinin gücləndirilməsinə daim diqqət göstərir. Məcburi köçkünlər üçün yeni qəsəbələr salınır, onlara mənzillərin verilməsində ədalət və şəffaflıq təmin edilir.
Bildirilib ki, sosial müdafiəyə xüsusi ehtiyacı olan vətəndaşların problemlərinə həssaslıqla yanaşan Birinci vitse-prezident xanım Mehriban Əliyevanın hələ də ən ağır vəziyyətdə və qəzalı şəraitdə yaşayan məcburi köçkünlərin yeni mənzillərə köçürülməsi ilə bağlı tapşırığının icrası davam etdirilir.
Qəbul zamanı məcburi köçkünlərin qaldırdıqları məsələlərin bir qismi yerindəcə həll olunub. Digər məsələlərin araşdırılması və lazımi tədbirlərin görülməsi ilə bağlı müvafiq tapşırıqlar verilib.
Dövlət Komitəsinin sədr müavini Sabir Əhmədov isə Tərtər rayonunda müvəqqəti məskunlaşmış məcburi köçkünləri qəbul edib.  Qəbul zamanı 70 nəfər məcburi köçkünün müxtəlif sosial problemlərlə bağlı müraciəti dinlənilib və araşdırılmaq üçün qeydə alınıb.
 


  • Rövşən Rzayev  Ağdamda məcburi köçkünləri qəbul edib -FOTO