120 saylı Cəbrayıl-Qubadlı Seçki Dairəsindən deputatlığa namizəd Məmmədov Zaur Əhməd oğlu təbliğat-təşviqat kampaniyası çərçivəsində görüşlərini davam etdirir.

Unikal.org xəbər verir ki, fevralın 5-də Mehdiabaddakı Qarant məcburi köçkün şəhərciyində növbəti görüş keçirilib. Görüşdə namizədin seçki qərargahının rəhbəri Elçin Abdullayev seçkiqabağı təbliğat-təşviqat kampaniyası ilə bağlı hesabat verib. O, namizədin seçicilərlə görüşlərində qaldırılan problemlərin bəzilərinin artıq həll olunduğunu bildirib və görüş iştirakçılarını əmin edib ki, Zaur Məmmədov deputat seçilərsə, daha ciddi problemlərin həllinə nail ola bilər.

Namizədin digər vəkili, əməkdar jurnalist Rəhman Orxan da çıxışında Zaur Məmmədovun Cəbrayıl və Qubadlı sakinləri üçün ən layiqli namizəd olduğunu bildirib.

Çıxış edən namizəd Zaur Məmmədov isə bu dəfə görüşə gələnlərə platforması barədə danışmaq istəmədiyini deyib. O, qeyd edib ki, əgər ona etimad göstərib səs versələr, onların Milli Məclisdəki səsi olacaq:

“Mən onu da qeyd edim ki, təkcə Cəbrayılın, Qubadlının deputatı yox, bütün Azərbaycan xalqının vəkili olmağa hazıram. İnanıram ki, siz öz adamınıza səs verəcəksiniz. Əsas odur ki, seçkiyə gəlin, qəlbinizdəki namizədə, inandığınız şəxsə səs verin. İmkan verməyin ki, kimlərsə, Sizin taleyinizlə bağlı qərar versin”.

Sonra Cəbrayıl batalyonunun komandiri olmuş Sevindik Məmmədov, Cəbrayıl ağsaqqallarından Hacı Qasım Səfərov, Məhərrəm Camalov çıxış edərək Zaur Məmmədovu tanıdıqlarını, onun hər zaman Cəbrayıl camaatının yanında olduğunu qeyd ediblər.

Çıxışçılar bildiriblər ki, Zaur Məmmədov təkcə seçki zamanı deyil, hər zaman Cəbrayıla bağlı olduğunu sübut edib.