Zaqatala rayonu, Çüdülü Binə adlanan massivdə ağacların kəsilməsi ilə bağlı Ekologiya və Təbii Sərvətlər Nazirliyinə daxil olan şikayət Nazirliyin əməkdaşları tərəfindən yerində araşdırılıb.

Unikal.org-un məlumatına görə, nazirliyin Ətraf Mühitin Mühafizəsi Departamentinin sektor müdiri Sadiq Dərafər jurnalistlərə bildirib ki, əraziyə keçirilən baxış zamanı 9 ağacın kəsildiyi və təbiətə 28 400 manat məbləğində ziyan dəydiyi müəyyən edilib.

Araşdırma zamanı ağacların Zaqatala rayonu Paşan kənd sakini Bazov Bazayev tərəfindən kəsildiyi məlum olub və faktla bağlı akt tərtib edilib.

"Dəymiş ziyanın məbləği cinayət tərkibi yaratdığından məsələyə hüquqi qiymət verilməsi və təqsirkar barəsində qanunamüvafiq tədbirlərin görülməsi üçün sənədlər hüquq mühafizə orqanlarına göndəriləcək."