Son günlər kriptovalyuta bazarının dəyişkənliyi və dələduzluq hallarının artması ilə bağlı daha ciddə nəzarətə alınmasının vacibliyi vurğulanır.

Unikal.org xarici KİV-ə istinadən xəbər verir ki, ötən gün Avropa Mərkəzi Bankının (ECB) rəhbəri Kristin Laqard bitkoinin möhtəkirliyə məruz qaldığını, çirkli pulların yuyulmasında istifadə olunduğunu qeyd edərək beynəlxalq miqyasda, bəlkə, G7 və ya G20 səviyyəsində kriptovalyuta bazarının tənzimlənməsinə ehtiyac olduğunu irəli sürüb.

ECB rəhbəri, həmçinin rəqəmli məkanda çirkli pulların yuyulması və terrorçuluğun maliyyələşdirilməsinə qarşı qabaqlayıcı tədbirlər hazırlayan Maliyyə Fəaliyyətlərini Tənzimləmə Qrupu (FATF) tərəfindən də kriptovalyutalara getdikcə daha çox diqqət yetirildiyini dilə gətirib.

Həmçinin Böyük Britaniya Maliyyə İdarəçilik Qurumu (FCA) da kriptovalyutalara əsaslanan qanunsuz yatırım zəncirlərinin geniş vüsət aldığını qeyd edərək bu cür zəncirlərdə iştirak edən hər kəsin bütün pullarını itirə biləcəyinə hazır olmasını bildirib.  Bir mənbənin sözlərinə görə, FCA kriptovalyutaların məzənnə dəyişkənliyi nəticəsində istehlakçıları maraqlandıraraq həmin aktivlərə yatırımların artmasına səbəb olacağından narahatdır.

Qeyd edək ki, ötən il ərzində 4 dəfədən çox bahalaşaraq yanvarın əvvəlində 40 min ABŞ dollarını “görən” bitkoin daha sonra müəmmalı səbəbdən 17 faiz ucuzlaşıb. Bu cür dəyişkənlik bir çox böyük sərmayə təsisatlarını perikdirir.