Bu gün Ermənistanın işğalından azad olunan ərazilərə səfər edən Azərbaycandakı xarici səfirlər, hərbi attaşelər və beynəlxalq təşkilatların Azərbaycandakı nümayəndəliklərinin rəhbərləri Cəbrayıl rayonunun Cocuq Mərcanlı kəndindən Cəbrayıl şəhərinə yola düşüblər.

Unikal.org xəbər verir ki, diplomatlar hazırda Cəbrayıl şəhərindədirlər.

Azərbaycan Prezidentinin köməkçisi - Prezident Administrasiyasının xarici siyasət məsələləri şöbəsinin müdiri Hikmət Hacıyev xarici diplomatlara şəhərlə bağlı geniş məlumat verib.

Diplomatlar Cəbrayıldakı qəbiristanlıq, mədəniyyət evi və oradakı bütün dağıntı ilə tanış olurlar. Onlar daha sonra Xudafərin körpüsü istiqamətinə yollanacaqlar.

***

11:14

Azərbaycanda akkreditə olunmuş diplomatik korpusun nümayəndələri işğaldan azad edilmiş Cocuq Mərcanlıdadırlar.

Unikal.org xəbər verir ki, Azərbaycan Prezidentinin köməkçisi - Prezident Administrasiyasının Xarici siyasət məsələləri şöbəsinin müdiri Hikmət Hacıyev diplomatlara işğaldan azad edilmiş Cəbrayıl və Zəngilan rayonlarına səfər barədə ümumi məlumat verib, həmçinin Cocuq Mərcanlının qayıdış rəmzi olduğunu bildirib.

***

09:34

Azərbaycanın xarici işlər naziri Ceyhun Bayramov prezidentin köməkçisi Hikmət Hacıyev diplomatik korpus nümayəndələri ilə birgə işğaldan azad olunmuş bölgələrə səfər edirlər.

Unikal.org xəbər verir ki, bu barədə Hikmət Hacıyev "Twitter" səhifəsində paylaşım edib.

"Prezident İlham Əliyevin tapşırığı əsasında xarici işlər naziri ilə birgə diplomatik korpusla - səfirlər, hərbi attaşelər və Azərbaycanda akkreditə olunmuş beynəlxalq təşkilatların rəhbərləri ilə birlikdə Azərbaycanın işğaldan azad olunmuş Cəbrayıl və Zəngilan bölgələrini ziyarət etmək üçün yoldayıq", - deyə paylaşımda qeyd olunub.