Fevralın 9-da Rusiyanın 16 telekanalının yayımına qadağa qoyan Latviya hökuməti həmin kanalları izləyən vətəndaşlara cərimə tətbiq edəcək.

Unikal.org “Sputnik”ə istinadən xəbər verir ki, bu, kanallara qadağa qoyulmasından sonra atılan ən sərt addımlardan biridir.

Latviya parlamentinin yanvarın sonunda qəbul etdiyi və icazəsiz yayımları izləyənlərə cəza verilməsini nəzərdə tutan qanunun təsir etdiyi kanallar arasında onlarla Rusiya kanalı olduğu bildirilib.

“İnformasiya sahəmizi qoruduq, qoruyuruq və qoruyacağıq”, - Latviya Milli Media Şurasının rəhbəri İvars Abolins qeyd edib.

Latviyalı rəsmilər telekanalların yayımının dayandırılmasını Rusiya kanallarındakı qonaqların nifrəti təşviq etməsi və Avropada müharibə çağırışı etməsi ilə əlaqələndiriblər.

Qeyd edək ki, qatı millətçi mövqeyilə tanınan “Rossiya 1” telekanalının aparıcısı Vladimir Solovyov Latviyada arzuolunmaz şəxs elan edilib.