Piyada "KamAz"ın təkərləri altda can verdi
Piyada "KamAz"ın təkərləri altda can verdi

Abşeron rayonunun Qobu qəsəbəsində piyadanın ölümü ilə nəticələnən yol nəqliyyat hadisəsi baş verib. Hadisə yerinə Fövqəladə Hallar Nazirliyinin (FHN) Xüsusi Riskli Xilasetmə Xidmətinin əməkdaşları cəlb olunublar.
Xilasedicilər hadisə yerində əməliyyat şəraitini qiymətləndirərkən məlum olub ki, "KamAZ" markalı yük avtomobili divara çırpılıb və yol kənarında dayanan piyadanı vurub. Xilasedicilər qəza nəticəsində avtomobilin təkərləri altında qalan vətəndaşın cəsədini təhlükəsizlik qaydalarına riayət etməklə xüsusi alət və avadanlıqlar vasitəsilə müvafiq qaydada çıxarıb və aidiyyəti üzrə təhvil veriblər. Sabirabadda baş verən qəzada da bir nəfər ölüb, 3 nəfər yaralanıb. BDYPİ-dən verilən məlumata görə, qəza ötən gün saat 19.00 radələrində Hacıqabul-Bəhrəmtəpə yolunun 21-ci kilometrliyində, Şəhriyar kəndi ərazisində baş verib. Ağcabədi rayonunun Salmanbəyli kənd sakini 1986-cı il təvəllüdlü Soltanov Ülfət Hüseyn oğlunun idarə etdiyi "Mercedes" markalı 04 BX 497 dövlət nömrə nişanlı avtomobil sərt döngədə idarəetməni itirərək yoldan çıxıb və aşıb. Nəticədə sürücü də daxil olmaqla avtomobildə olan sərnişinlər Ağcabədi rayon Salmanbəyli kənd sakinləri 1991-ci il təvəllüdlü Mikayıllı Nahid Hüseyn oğlu və 1996-cı il təvəllüdlü Sultanlı Zaur Ələddin oğlu yaralı vəziyyətdə Şirvan şəhər xəstəxanasına yerləşdirilib. Digər sərnişin Ağcabədi şəhəri Nərimanov küçəsi 4 ünvanında yaşayan 1988-ci il təvəllüdlü Qurbanov Vasif Etibar oğlu hadisə yerində aldığı xəsarətlərdən dünyasını dəyişib. Nahid Mikayıllının vəziyyəti isə kritik ağır olduğundan reanimasiya şöbəsinə yerləşdirilib.
Həkimlərin bildirdiyinə görə, yaralı kəllə-beyin travması, qabırğaların çoxsaylı sınığı və plevropulmonal şok vəziyyətində süni nəfəsalma aparatına qoşulub. Qeyd edək ki, qəzaya uğrayan şəxslər "FINCA Azerbaijan"-nın Ağcəbədi filialının əməkdaşları olub.
Faktlarla bağlı Baş Dövlət Yol Polisi İdarəsində araşdırma aparılır.