"Ermənistan parlamentinin Avropaya inteqrasiya məsələləri üzrə daimi komissiyasının sədri Naira Zoqrabyanın Avropa Şurasının baş katibi Torbyorn Yaqlandın Ermənistanı dərhal Azərbaycan hərbçisinin meyidini qaytarmağa çağıran bəyanatı barədə səsləndirdiyi qərəzli fikirlər insani düşüncədən kənardır".

Unikal.org xəbər verir ki, bunu Trend-ə Milli Məclisin deputatı, Azərbaycanın AŞPA-dakı nümayəndə heyətinin üzvü Rövşən Rzayev deyib.

R.Rzayev bildirib ki, əgər N.Zoqrabyan normal düşüncəyə malik olsaydı, bu cür mövqedən çıxış etməzdi: "Avropa Şurası baş katibinin beynəlxalq humanitar hüquqdan və konvensiyalardan irəli gələn tələbləri ilə bağlı beynəlxalq hüquq prinsiplərinə zidd siyasət yürüdən Ermənistan nümayəndəsinin başqa mövqedən çıxış etməsi, təbii ki, çətin olardı. Onlar daim bu cür mövqedən çıxış edirlər və AŞPA çərçivəsində də Ermənistan nümayəndə heyətinin bütün fəaliyyəti işğalçı siyasətlərini davam etdirməyə yönəlir. Onlar öz işğalçı siyasətləri, o cümlədən Azərbaycan xalqına qarşı törətdikləri Xocalı soyqırımı və digər qırğınlar barədə beynəlxalq ictimaiyyətin fikrini yanlış istiqamətə yönəltməyə çalışırlar".

Deputat bildirib ki, Ermənistan tərəfi bu cür qərəzli, beynəlxalq prinsiplərə zidd və təxribat xarakterli bəyanatlar səsləndirməklə Azərbaycan tərəfi ilə görüşlərdən boyun qaçırmağa çalışır: "Bilirsiniz ki, Dağlıq Qarabağ münaqişəsi ilə bağlı AŞPA çərçivəsində alt-komitə yaradılıb, lakin Ermənistan tərəfinin birtərəfli qaydada görüşlərdən imtina etməsi səbəbindən uzun illərdir ki, bu alt-komitə fəaliyyət göstərə bilmir. Ermənistan prezidenti Serj Sarkisyan da AŞPA-da çıxış edərkən quruma göstəriş formasında çatdırmışdı: "Siz nahaq yerə bu alt-komitəni yaratmısınız, biz bunu istəmirik və bu alt-komitə fəaliyyət göstərməyəcək". Göründüyü kimi. bu səbəblərdən də alt-komitə fəaliyyət göstərə bilmir".