Ədliyyə Nazirliyinin Penitensiar xidməti bəzi KİV-lərdə əfv olunmuş məhbusun yerinə başqa məhbusun azadlığa buraxılması ilə bağlı xəbərlərə münasibət bildirib.

Qurumun İctimaiyyətlə əlaqələr şöbəsindən Unikal.org-a verilən məlumatda xatırladılıb ki, məhkumun yaxın qohumları və vəkilinə istinad edilərək qeyd olunur ki, guya Ədliyyə Nazirliyi Penitensiar xidmətinin tabeçiliyində olan cəzaçəkmə müəssisələrinin birində saxlanılan məhkum Elvin Bəxtiyar oğlu Mahmudovun əvəzinə eyni adı və soyadı olan, lakin atasının adı və təvəllüdü fərqli olan digər məhkum ölkə Prezidentinin əfv sərəncamı ilə qalan cəzadan azad olunub: 

"Ədliyyə Nazirliyi Penitensiar xidməti bildirir ki, dərc olunmuş məlumat tamamilə yanlışdır və böhtan xarakterlidir. Azərbaycan Respublikası Prezidentinin 16 mart 2017-ci il tarixli "Məhkum edilmiş bir sıra şəxslərin əfv olunması haqqında sərəncamı dürüst və vaxtında icra edilib. Əfv olunan şəxslərin arasında bu məlumatda dərc olunan məhkumun adı yoxdur. Əfv haqqında sərəncamın əhatə dairəsində olmuş eyni adı və soyadı olan, lakin atasının adı və təvəllüdü fərqli olan digər məhkum tam qanuna uyğun olaraq azad edilib. Acınacaqlı haldır ki, bəzi informasiya saytları ilə yanaşı yalan, iftira xarakterli, dəqiqləşdirilməmiş məlumatları vəkil funksiyalarını yerinə yetirən şəxslər də yayır. Düşünülməmiş hərəkətləri ilə vəkil adına xələl gətirən şəxsin hansı məqsədlər daşıdığı qeyri-müəyyəndir. Lakin hesab edirik ki, qeyd olunan faktlar aidiyyəti orqanlar tərəfindən ciddi araşdırılacaq və vəzifəli şəxsləri ağır cinayətlərdə ittiham etmiş vəkilin fəaliyyətinə hüquqi qiymət veriləcək".