Artıq neçə ildir, Vəlvələ çayının vadisində yerləşən Qubanın ən qədim kəndlərindən hesab olunan Qonaqkənd sakinləri çayda suyun səviyyəsinin qalxması səbəbindən narahatçılıq keçirir, amma hər il suyun daşması vaxtı sakinlərin şikayəti mətbuatda işıqlansa da, sakinlər tərəfindən rəsmi qurumlara müraciət olunsa da, vəziyyət dəyişməz olaraq qalır. Bu dəfə də deyəsən, vəziyyət təkrarlanır.

Bütov kənd əhalisinin həyatı təhlükə altındadır. Quba sakinləri "həyacan təbili" çalırlar, səslərini isə eşidən yoxdur.

Xatırladaq ki, Qonaqkənd yaşayış məntəqəsi Vəlvələ çayının vadisində yerləşdiyindən dağlardan axıb gələn sel suları da qəsəbə üçün həmişə təhlükə yaradır.

Qonaqkənd sakini Niyatulla Məhərrəm oğlu Orucovun verdiyi məlumata görə, son günlər bu təhlükə daha da artıb. Vəziyyət o qədər kritikləşib ki, son günlər yağan güclü yağış nəticəsində çayın səviyyəsi xeyli qalxıb, evlərin hasarlarına çatıb və hətta həyətyanı sahələrə dolub, xeyli sakinin bostanına ziyan dəyib, onlar mal-qaralarını çölə çıxara bilmirlər, çayın digər sahilinə keçməkdə çətinlik çəkirlər.

Ən acınacaqlısı isə, selin qəsəbədə yaşayan 1500-dən çox insanın təsərrüfatına vurduğu ziyan yox, birbaşa onların həyatına təhlükə yaratmasıdır. Kənd sakinləri bildirirlər ki, onlar dəfələrlə məsələ ilə bağlı aidiyyatı dövlət qurumlarına müraciət etsələr də, ciddi heç bir tədbir görülmür. Halbuki real vəziyyət ərazinin relyefinin mürəkkəb olmasına baxmayaraq, təxirəsalınmaz tədbirlərin görülməsini tələb edir.

Niyatulla Orucov bildirir ki, keçən il də sürüşmə nəticəsində keçmiş Atuş kəndinin ərazisində Vəlvələ çayının qabağı "boğulmuşdu" və çayın məcrası genişlənmiş, suyun da səviyyəsi qalxmışdı. Onun sözlərinə görə, son zamanlar qəsəbə sakinlərinin çoxu, selin qəsəbəni basması təhlükəsindən dolayı səksəkə içindədir.

"Hər an faicə baş verə, camaat su içində qala bilər. Çayın səviyyəsi artıq evlərə çatır" - sakin bildirib.

"Yerli bələdiyyəyə də, Quba Rayon İcra Hakimiyyətinə də vəziyyətlə bağlı dəfələrlə məlumat verilib. Ancaq yerli orqanlar hər dəfə "məsələdən məlumatlıyıq" cavabını verir. Gəlib baxıblar da... Amma deyirlər, onların yetərincə texnikası yoxdur və bu məsələ dövlət səviyyəsində həll olunmalıdır", - N.Orucov vurğulayıb.

O, camaatın konret istəyini də çatdırıb: "Bizim istəyimiz odur ki, ya çayın qabağına qoruyucu bənd çəksinlər ki, biz evimizdə rahat yaşaya bilək. Ya da bizi buradan köçürsünlər. Çünki bu vəziyyətdə, özü də hər gün, hər saat həyacan içində yaşayırıq. Əgər bizim imkanımız olsaydı, özümüz nəsə bir tədbir görərdik, amma bizim belə imkanımız yoxdur. Allahın ümidinə qalmışıq".

N.Orucov bildirir ki, bir neçə gün bundan qabaq da o məsələ ilə bağlı Quba rayon icra hakimiyyətinin başçısı Yaşar Məmmədova teleqram vurub, amma hələlik reaksiya yoxdur.

Ümid edirik ki, bu yazıdan sonra müvafiq qurumlar, ən azından problemə laqeyd yanaşmayacaq, vəziyyət araşdırılacaq və müvafiq tədbirlər görüləcək. Əks halda, yaşanacaqları təsəvvür etmək lazımdır.