Azərbaycan Dövlət Neft Şirkəti (SOCAR) növbəti illərdə qaz hasilatını artırmağı planlaşdırır.
Unikal.org "Reporta istinadən xəbər verir ki, bunu SOCAR prezidenti Rövnəq Abdullayev "Reuters agentliyinə müsahibəsində bildirib.
SOCAR prezidenti qeyd edib ki, daxildə təbii qaz tələbatı yerli hasilat hesabına tam ödənilsə də, təbii qazın ucuz olduğu yay aylarında xaricdən qaz alınması məqsədəuyğundur:
"Buna görə də qaz anbarlarımızın kommersiya imkanlarından tam yararlanmaq üçün İran vasitəsi ilə Türkmən qazını yay aylarında ucuz qiymətə alır, qış aylarında isə daha sərfəli qiymətlə ixrac edirik. Bununla da, ölkəmizə əlavə dəyər qazandırırıq.
R. Abdullayev bildirib ki, bir neçə qaz yatağında hasilata başlanması planlaşdırılır.
Onun sözlərinə görə, 2019-cu ildə "Abşeron yatağının I fazasından 1,5 mlrd. kubmetr qaz, 2022-2023-cü ildə isə II fazadan 5 mlrd. kubmetr qaz hasilatı nəzərdə tutulur: "Bununla yanaşı, yaxın 3-5 il ərzində SOCAR "Ümid yatağında iki yeni stasionar dəniz özülünün tikintisini və bu özüllərdən ən azı 8 yeni yüksək hasilatlı quyunun qazılmasını planlaşdırır.
"SOCAR 2018-ci ilin ikinci yarısında "Babək strukturunda kəşfiyyat qazmasına başlamağı planlaşdırır. Bütün bunlar sayəsində, növbəti illərdə həm daxili, həm də xarici bazarda satdığımız təbii qazın həcmi ciddi şəkildə artacaq,-SOCAR prezidenti müsahibəsində qeyd edib.
R. Abdullayev Azərbaycanın OPEC qarşısındakı öhdəliyindən də danışaraq qeyd eidb ki, OPEC ölkələrinin neft hasilatının azaldılması ilə bağlı qərarını Azərbaycan da dəstəkləyir və biz bu istiqamətdə üzərimizə götürdüyümüz öhdəlikləri indiyə qədər yerinə yetirmişik: "Baxmayaraq ki, bizim neft hasilatımız buna görə cüzi azalıb, amma neft qiymətlərinin yüksəlməsi fonunda satışlardan əldə etdiyimiz gəlir artıb. Azərbaycanın bizim əsas hədəfi milli sərvətimiz olan neftin dəyərindən aşağı qiymətə satılmasının qarşısını almaqdır. Nəticə olaraq, bizim hasilatımız bir qədər azalsa da, neft gəlirlərimiz artıb. Bu da bizim bu istiqamətdə doğru qərar verdiyimizi göstərir.