17 Noyabr 2018
16 Noyabr 2018
Jurnalisti təhqir edən generalın qardaşı üzr istədi - FOTOLAR+VİDEO
CƏMİYYƏT 16:13 / 20.06.2018
İyunun 2-də güclü sel nəticəsində Göyçay çayı üzərində avtomobil körpüsünün uçması ilə bağlı başlanan cinayətdə DİN-in Baş Pasport, Qeydiyyat və Miqrasiya İdarəsinin sabiq rəisi, polis general-mayoru və Quba rayon İcra Hakimiyyətinin sabiq başçısı Ərziman Əliyevin qardaşı Nəciməddin Mikayıl oğlu Əliyevin həbs olunması ilə bağlı jurnalistin sualını cavablandıran zaman general Ərziman Əliyev tərəfindən Bizimyol.info saytının əməkdaşı Əli Cahangiroğlunun ağır söyüşlərələ təhqir olunması ilə bağlı xəbər vermişdik.

Unikal.org xəbər verir ki, məsələ ilə bağlı ötən gün general Ərziman Əliyevin qardaşı Polad Əliyev jurnalist Əli Cahangiroğlu ilə əlaqə saxlayaraq çox üzgün, peşman olduqlarını bildirib, jurnalistdən üzr istəyib. O yazılı açıqlamasında bildirib ki, general qardaşı Ərziman Əliyevə məxsus telefona həmin gün o, özü cavab verib və şok vəziyyətində olduğu üçün bilmədən jurnalisti təhqir edib.

Polad Əliyev təkidlə bildirib ki, həmin gün qardaşı Ərziman Əliyevlə ona məxsus olan avtomaşında birlikdə olub və qardaşı maşından düşdükdən sonra mobil telefonu avtomaşında qalıb, jurnalist Əli Cahangiroğlunun zənginə məhs özü cavab verib. Bu səbəbdən etdiyi söyüşə görə üzr istəyən və üzürxaxlığının qəbul olunmasını xahiş edən general-mayor Ərziman Əliyevin qardaşı Polad Əliyev üzrxahlıqla bağlı səsli açıqlama da verib. Jurnalist Əli Cahangiroğlu deyib ki, generalın "ailə üzvlərinin narahatlığını, qardaşının bilavasitə gələrək təmsil etdiyi ailənin və özünün adından yazılı üzr istəməsini və bir çox ziyalıların, media rəhbərlərinin xahişini nəzərə alaraq” üzxahlığı qəbul edir və generalı bağışlayır.

Redaksiyadan: "Bizim Yol” qəzetinin və bizimyo.info saytının baş redaktoru Bahəddin Həziyev Polad Əliyevin açıqlamasını şərh edərək deyib:

"Biz baş vermiş olayı bir daha pisləyirik. Bir daha öz mövqeyimizdə qaldığımızı bildirirk. Jurnalistlə Ərzuman Əliyevin qardaşı deyil, özü danışıb; bunu səs yazısından da aydın görmək olur. Jurnalist ona salam verir, "Ərzuman müəllim, necəsiniz?” deyir. O da: "Çox sağ olun, yaxşıyam” deyə cavab verir. telefonu açan general Ərziman Əliyevin özü olub. Həm bu necə ailə tərbiyəsidir ki, bir qardaşın şəxsi telefonuna başqa qardaş telefon sahibinin adından cavab verir?! Ümumiyyətlə, bu insidentdən sonra general-mayor Ərzuman Əliyevin adından mənim əksər yaxın dostlarım, tanınmış ziyalılar, həmkarlarm da olmaqla xeyli sayda insan zəng edib onu bağışlamağımızı xahiş etdi. Mən də hər dəfə eyni mövqedən cavab verdim: "Ərzuman Əliyev jurnalstdən üzr istəsin, o da qəbul edərsə, bu insidentə nöqtə qoyular”. Bu telefon danışıqlarının heç birində heç kəs demədi ki, telefonu götürən Ərzuman Əliyev deyil, onun qardaşı olub. Bu, sonradan ortaya çıxmış məsələdir və məqsəd Ərzuman Əliyevi məsuliyyətdən yayındırmaq məqsədi güdüb”.

Baş redaktor deyib ki, jurnalist Əli Cahangiroğlu üzrxahlığı qəbul etsə də, məhkəmə iddiasından imtina etmiş olsa da, "Bizim Yol” redaksiyası insidentin günahkarının qismən cəzasız qaldığını düşünür:

"Günlərlə ölkənin ən qabaqcıl media quruluşları, ziyalılar, generallar, ictimaiyyət nümayəndələri, jurnalistlər bu olaya öz mənfi münasibətini bildirdi, ictimai qınaq çox böyük oldu. Ərzuman Əliyev Əli Cahangiroğluna dediklərinin cavabını artıqlaması ilə aldı. Buna baxmayaraq, "Bizim Yol” olaraq Ərzuman Əliyevin hüquqi müstəvidə cəzasız qalması bir daha onu göstərdi ki, qanunlar və ya qanunu tətbiq edənlər jurnalistləri sona qədər müdafiə etməkdən uzaqdırlar. Ərzuman Əliyevin əvəzindən kimin üzr istəyib-istəməməsindən asılı olmayaraq redaksiyamız və güman edirəm ki, çoxminli media mənsubları bununla barışmır və öz mövqeyində qalır”.