“Bu gün tarixi gündür. 4 il əvvəl birlikdə təməlini qoyduğumuz TANAP bu gün Avropa sərhədinə çatdı. Bu münasibətlə hamımızı ürəkdən təbrik edirəm. Əminəm ki, TANAP-ın ömrü uzun olacaq, Türkiyə və Azərbaycan xalqlarına, eləcə də digər qonşu xalqlara fayda və tərəqqi verəcək”.

Unikal.org-un məlumatına görə, bunu Azərbaycan Prezidenti İlham Əliyev bu gün Türkiyənin Ədirnə vilayətinin İpsala qəsəbəsində TANAP layihəsinin Avropa ilə birləşəcək hissəsinin açılış mərasimində çıxışında deyib.

Dövlət başçısı TANAP-ın təməlinin 4 il əvvəl Qars şəhərində qoyulduğunu xatırladıb: “Dörd il əvvəl Qars şəhərində əziz qardaşım, Prezident Rəcəb Tayyib Ərdoğanla birlikdə TANAP-ın təməlini qoyduq. Ancaq TANAP-a gələn yol 2012-ci ildə başlamışdı. Tarixi İstanbul anlaşması nəticəsində TANAP-a yaşıl işıq yandırıldı. Tarixi İstanbul anlaşması Türkiyə və Azərbaycanın birgə siyasi iradəsi nəticəsində mümkün olub. Çünki TANAP-a qədər, bu qərarın qəbul olunmasına qədər Azərbaycan qazının Türkiyəyə və ondan sonra Avropaya nəql edilməsi ətrafında bir neçə il uzun müzakirələr aparılmışdı, lakin heç bir nəticəsi olmamışdı. Belə olan halda, əziz qardaşım Rəcəb Tayyib Ərdoğanla birlikdə qərara gəldik ki, biz özümüzə lazım olan bu böyük layihəni özümüz həyata keçirəcək. Belə də oldu və bu gün bu layihəyə qoşulan BP şirkəti bizim tərəfdaşımızdı. Ancaq əsas texniki və maliyyə yükünü Azərbaycan və Türkiyə öz üzərinə götürüb”.

Prezident bildirib ki, TANAP-a qədər aparılan birgə işlər TANAP-a yol açıb: “TANAP-a qədər apardığımız birgə işlər TANAP-a yol açdı. Çünki 2006-cı ildə Bakı-Tbilsi-Ceyhan boru kəməri istismara verilməsəydi, bu gün TANAP haqqında danışmaq mümkün olmazdı. Bakı-Tbilisi-Ceyhan neft boru kəmərinin təməlini müasir Azərbaycan dövlətinin lideri Heydər Əliyev öz əlləri ilə qoyub. 2006-cı ildə isə əziz qardaşım Prezident Ərdoğanla birlikdə Ceyhanda biz Bakı-Tbilisi-Ceyhan neft kəmərini istismara verdik”.

Dövlət başçısı qeyd edib ki, bu günə qədər Bakı-Tbilisi-Ceyhan kəməri vasitəsilə Türkiyə və dünya bazarlarına 450 milyon tondan çox Azərbaycan və başqa dövlətlərin nefti nəql edilib: “Bunun böyük hissəsi - 400 milyon tondan çoxunu Azərbaycan nefti, 27 milyon tonunu Türkmənistan, 12 milyon tonunu Qazaxıstan, 7 milyon tonunu Rusiya nefti təşkil edir. Bir sözlə, BTC nəinki Azərbaycan nefti, digər ölkələrin nefti üçün də gözəl bir infrastruktur layihəsi oldu və bu gün də uğurla fəaliyyət göstərir. 2007-ci ildə yenə də bu bölgədə əziz qardaşımla Bakı-Tbilisi-Ərzurum qaz xəttinin açılışını etdik. Bu da TANAP-a yol açan önəmli layihə idi”.

Azərbaycan Prezidenti TANAP-ın inşasında iştirak etmiş bütün insanlara təşəkkürünü də bildirib: “Onların fədakarlığı, onların peşəkarlığı bu böyük layihənin vaxtında istismara verilməsində mühüm rol oynayıb”.