Futbol üzrə Azərbaycan Premyer Liqasında XIV turun daha bir oyunu keçirilib.

Unikal.org-un məlumatına görə, ilin son turunun növbəti matçında "Zirə" "Səbail"i qəbul edib. 

Zirə İdman Kompleksinin stadionunda təşkil olunan qarşılaşma meydan sahiblərinin 4:1 hesablı qələbəsi ilə yekunlaşıb. Görüşdə hesab 5-cı dəqiqədə açılıb. "Zirə"nin heyətində Nicat Süleymanov fərqlənib. Gənc yarımmüdafiəçi 20-ci dəqiqədə özünün və komandasının ikinci qoluna imza atıb. İlk yarıda başqa qol olmayıb. 60-cı dəqiqədə "Zirə"nin rumıniyalı müdafiəçisi Adrian Skarlatake fərqi daha da artırıb. 78-ci dəqiqədə isə Eriko da Silva "Səbail"in təsəlli qolunun müəllifi olub. 89-cu dəqiqədə isə Tellur Mütəllimov görüşdə son nöqtəni qoyub.

Bu nəticədən sonra "Zirə" 17-ci xalını qazanıb. Qəsəbə təmsilçisinin çempionatın ilk yarısını beşinci pillədə başa vuracağı dəqiqləşib. "Səbail" isə 12 xalla sonuncu - 8-ci yerdə qalıb. Axırıncı qələbəsini 4-cü turda qazanan komandanın qələbəsiz oyunlar seriyası 10-a çatıb.