Şəki rayonunun Bideyiz, İnçə, Cunud Biləcik və Qaxın Qaşqaçay, Güllük, Almalı, Cəlayir, Zəyəm kəndləri yaxınlığındakı əkinə yararsız bələdiyyə və meşə fondu torpaqlarının bir hissəsində intensiv fındıq bağları salınıb. Həmin ərazilərdə bu işləri “AGA Group”un şimal-qərb bölgəsindəki təmsilçisi “Monte Ferro" Şirkəti həyata keçirir.

Bu barədə Unikal.org-a şirkətin mətbuat xidmətindən məlumat verilib. Bildirilib ki, bu günə qədər istifadə olunmayan əkin və bağçılıq üçün yararsız sayılan, təqribən, 2000 hektara yaxın ərazidə yeni fındıq kolları əkilib.

"Monte Ferro" Aqroparkının Qax rayon birliyinin rəhbəri Xəzər Əhmədovun sözlərinə görə, artıq bu vaxta qədər əkin aparılan ərazilərdə üç, iki və bir illik intensiv fındıq bağları salınıb: Hazırda isə, Şəki rayonunun Cunud kəndi yaxınlığında 1000 hektar ərazidə payızlıq əkin üçün hazırlıq işləri gedir. Ərazi texnikalar vasitəsilə iri çay daşlarından və koldan təmizlənir. Qax rayonunun Güllük kəndində isə, yeni salınacaq olan intensiv fındıq bağlarında əkilməsi nəzərdə tutulan tinglər yetişdirilir. Bu tinglər əkin zamanı sahələrə köçürüləcək.

Ərazilər "Monte Ferro" şirkəti tərəfindən uzun müddətə Ekologiya və Təbii Sərvətlər Nazirliyindən icarəyə götürülüb, çay daşı və kol-kosdan təmizlənərək əkin üçün yararlı vəziyyətə gətirilib. Fındıq əkilən bağlar Azərbaycanda ilk dəfə olaraq müasir damla suvarma sistemi ilə təmin olunub. İntensiv fındıq bağlarında subartezian quyuları qazılıb, bir neçə ədəd 10 min kubluq su hovuzları və elektrik təminatı ilə təchiz olunub. Bağ işlərinə il ərzində daimi və mövsümü olaraq kənd əhalisi cəlb olunub.

Şəki rayon Cunud kənd sakini 64 yaşlı Rəcəb Abdurəhmanov söyləyir ki, artıq altı aydır yaşadığı kəndin yaxınlığında işlə təmin olunub və aqronom kimi çalışır: Biz bu əraziləri daim kolluq və daşlıq ərazi kimi görmüşük. Ancaq hazırda burada fındıq əkininin aparılması üçün əhəmiyyətli dərəcədə işlər görülür."Ümid edirəm ki, əkdiyimiz fındıq kolları öz bəhrəsini verəcək və gələcəkdə də bu bağlarda biz çalışacağıq"

Qeyd edək ki, "Monte Ferro" şirkəti tərəfindən 2022-ci ilə kimi fındıq bağlarının ümumi sahəsinin 5000 hektara çatdırılması planlaşdırılır.

“AGA Group” bu işlərin həyata keçirilməsi üçün yaradılan biznes mühitə görə ölkə başçısı Cənab İlham Əliyevə, işlərin aparıldığı müddətdə dəstəyinə görə Ekologiya və Təbii Sərvətlər, İqtisadiyyat, Kənd Təsərrüfatı  Nazirliklərinə, Meliorasiya və Su Təsərrüfatı Açıq Səhmdar Cəmiyyətinə, Şəki və Qax rayonlarının İcra Hakimiyyətlərinə, Aqrar Kredit və İnkişaf Agentliyinə və Sahibkarlara Kömək Milli Fonduna öz minnətdarlığını bildirir.