Rabitəbank hərbiçilərimizin və düşmən təxribatı nəticəsində zərər dəymiş mülki vətəndaşlarımızın dəstəklənməsi ilə bağlı tədbirlər görəcək.

Unikal.org xəbər verir ki, Bank Azərbaycan Respublikasının Mərkəzi Bankının tövsiyəsi ilə aşağıdakı qərarların icrasına öhdəlik verir:

1. Torpaqlarımızın azad edilməsi uğrunda döyüşlərdə Şəhid olmuş hərbiçilərimizin banka olan istehlak kreditləri və onlara hesablanmış faizlər və digər ödəmələr tam həcmdə silinəcək;

2. Düşmən təxribatı nəticəsində həyatını itirmiş mülki vətəndaşlarımızın banka olan istehlak kreditləri və onlara hesablanmış faizlər və digər ödəmələr tam həcmdə silinəcək;

3. Hərbi əməliyyatlar zamanı yaralanmış hərbiçilərin banka olan kredit öhdəliklərinə faizlərin və digər ödəmələrin hesablanması 27 sentyabr 2020-ci il tarixindən tam dayandırılacaq;

4. Torpaqlarımızın azad edilməsi uğrunda döyüşlərdə Şəhid olmuş bank əməkdaşlarının ailələrinə şəhidin bir illik əmək haqqı miqdarında vəsait ödəniləcək;

5. Torpaqlarımızın azad edilməsi uğrunda döyüşlərdə yaralanmış bank əməkdaşlarına onun üç aylıq əmək haqqı miqdarında birdəfəlik maddi yardım ödəniləcək.

Bu kateqoriyadan olan şəxslərin kredit öhdəliklərinin yerinə yetirilməsi ilə bağlı hazırda hər hansısa bir tələb irəli sürülmür və kredit tarixçələri pisləşdirilmir.

Qeyd edək ki, bundan öncə ölkəmizin ərazi bütövlüyü uğrunda aparılan haqq döyüşündə ordumuza dəstək məqsədilə “Rabitəbank” Silahlı Qüvvələrə Yardım Fonduna 100.000 AZN köçürüb. Həmçinin Bankın mobil əlavəsi olan “Rabitəbank Mobil” tətbiqində də vətəndaşlara fonda maddi yardımı asanlaşdıran köçürmə funksiyası da istifadəyə verilib.

“Rabitəbank” ordumuzun hazırki ruh yüksəkliyi, döyüş əzmkarlığı və parlaq qələbələri ilə fəxr edir, ordu sıralarına qoşulan bank əməkdaşları da daxil olmaqla bütün hərbçilərimizə sağ-salamat evlərinə qayıtmağı arzulayır! Zəfər Azərbaycan ordusundadır!

"Rabitəbank" ASC, Azərbaycanın 16 regionu və Bakı şəhərində 27 xidmət məntəqəsi və 71 ATM-i, "Rabitabank Mobile" tətbiqi, İnternet Bankçılıq platforması və "RabitaBot" çatbotu, 133 nömrəli Çağrı Mərkəzi ilə müştərilərin xidmətindədir.