Qırğız Respublikasında bu günlərdəki erkən prezident seçkilərində qalib gəlmiş hazırkı Baş nazir Sadir Japarov baş nazir vəzifəsindən istefa verib.

Unikal.org xəbər verir ki, Prezident Aparatının rəhbəri Söyünbek Kasmambetov bu gün jurnalistlərə Sjaparovun başçılıq etdiyi hökumətin də istefa verdiyini bildirib: “Hazırkı hökumət üzvləri yeni hökumət heyəti seçilənədək vəzifə başında qalacaqlar”.

Yeni Prezident Sadir Japarovun yanvarın 28-də keçiriləcək andiçmə mərasimi ilə bağlı Təşkilat Komitəsi yaradılıb. Bu barədə fərmanı ölkə prezidenti əvəzi, Joğorku Keneş (Ali Məclis) sədri Talant Mamıtov imzalayıb.

Xatırladaq ki, Mərkəzi Seçki Komissiyası tərəfindən dünən təsdiqlənmiş rəsmi nəticələrə görə S.Japarov 1 105 248 səs qazanıb ki, bu da səsvermədə iştirak edənlərin 79,2 faizidir.