Ukrayna azərbaycanlıları girovlarla bağlı bəyanat yayıb
Ukrayna Azərbaycanlıları Birləşmiş Diasporu (UABD) Azərbaycanın Kəlbəcər rayonunda Ermənistan silahlı qüvvələri tərəfindən girov götürülən azərbaycanlılar Dilqəm Əsgərova və Şahbaz Quliyevə çıxarılan "hökm"lə bağlı etiraz bəyanatı yayıb.
Bu barədə Diasporla iş üzrə Dövlət Komitəsindən məlumat verilib.
Bəyanat BMT-nin İnsan Hüquqları üzrə Ali Komissarlığına və ATƏT-in Ukrayna nümayəndəliyinə, eləcə də ATƏT-in Minsk qrupunda təmsil olunan ölkələrin Kiyevdəki səfirliklərinə göndərilib.
Bəyanatda Dilqəm Əsgərov və Şahbaz Quliyevin "məhkəmə prosesi"nə və barələrində çıxarılan "hökm"ə etiraz edən UADB Ermənistanın işğal etdiyi Azərbaycanın torpaqlarında olan bu insanların guya sərhədləri pozmaqda ittiham edilərək heç bir hüquqi əsası olmadan uydurma məhkəmə prosesinə cəlb edildiyini vurğulanır. Bildirilir ki, Dilqəm Əsgərov və Şahbaz Quliyevin girov götürüldüyü torpaqlar Ermənistan tərəfindən işğal edilmiş Azərbaycan ərazisidir, onlar doğulub böyüdükləri torpaqlarda yaxınlarının məzarlarını ziyarət etməyə gediblər və heç bir gizli planları, təxribatçı niyyətləri olmayıb.
Bəyanatda qeyd edilir ki, doğulduqları torpaqların həsrəti ilə Ermənistanın işğal altında saxladığı ərazilərə keçərkən girov götürülən Həsən Həsənovun işgəncələrlə öldürülməsi, Dilqəm Əsgərov və Şahbaz Quliyevin girov götürülməsi beynəlxalq norma və insan haqlarının qorunması prinsiplərinə ziddir: "BMT-nin Təhlükəsizlik Şurasının Azərbaycanın işğal olunmuş ərazilərinin boşaldılmasını nəzərdə tutan 822-ci qətnaməsini xatırladan bəyanat müəllifləri yazır ki, həmin sənəddə Kəlbəcər rayonunun Azərbaycan ərazisi olması təsdiqlənir, Azərbaycan əhalisinə qarşı etnik təmizləmə siyasəti ilə əlaqədar regionda, xüsusən də Kəlbəcərdə yaranmış fövqəladə humanitar vəziyyətdən BMT-nin ciddi narahatlığı ifadə edilir: "İşğaldan 20 ildən artıq müddət keçsə də, Ermənistan BMT Təhlükəsizlik Şurasının bu, habelə digər üç qətnaməsinə məhəl qoymamaqda davam edir, Ermənistan silahlı qüvvələrinin hələ də Azərbaycan, o cümlədən Kəlbəcər ərazisində olması isə qanunsuz işğalın davam etdiyini təsdiqləyir".
Bəyanatın sonunda Ukrayna Azərbaycanlıları Birləşmiş Diasporu beynəlxalq təşkilatları vicdanlarına söykənərək məsələyə hüquqi norma və prinsiplər çərçivəsində yanaşmağa çağırır.