Azərbaycan və Rusiya tarixən bir-biri ilə sıx bağlı olan, keçmişdən bu günədək daim qarşılıqlı anlaşma, sülh və sabitlik şəraitində yaşayan iki dost, qardaş dövlətlərdir. Ümummilli Liderimiz Heydər Əliyev tərəfindən əsası qoyulmuş bu sıx dostluq və əməkdaşlıq əlaqələri bu gün Azərbaycan Respublikasının Prezidenti cənab İlham Əliyev tərəfindən daha yüksək səviyyəyə çatdırılıb. 2010-cu ildən etibarən Azərbaycan Respublikasının Prezidenti cənab İlham Əliyevin göstəriş və tapşırığına əsasən, Heydər Əliyev Fondunun təşəbbüsü və dəstəyi ilə Həştərxan şəhərində bir sıra mühüm sosial, iqtisadi və mədəni infrastruktur layihələri  həyata keçirilib. 

Unikal.org xəbər verir  ki, Nərimanov Rayon İcra Hakimiyyətinin başçısı Abdin Fərzəliyev və onun başçılıq etdiyi nümayəndə heyətinin Rusiya Federasiyasının Həştərxan vilayətinə işgüzar səfəri baş tutub.  

İlk öncə nümayəndə heyəti, həmçinin Həştərxan vilayəti və şəhərinin rəsmiləri, diaspor fəalları və ictimaiyyət nümayəndələri Ulu Öndər Heydər Əliyevin Həştərxan şəhərinin mərkəzində ucaldılmış abidəsini ziyarət edib. Ümummilli Lider Heydər Əliyevin xatirəsini bir dəqiqəlik sükutla yad edərək, dahi şəxsiyyətin abidəsi önünə gül dəstələri qoyublar. 

Səfər çərçivəsində Heydər Əliyev Fondunun təşəbbüsü və dəstəyi ilə rekonstruksiya olunmuş Heydər Əliyev adına 11 nömrəli orta ümumtəhsil məktəbi ziyarət olunmuş, təhsil müəssisəsinin foyesində Azərbaycan xalqının Ümummilli Lideri Heydər Əliyevin büstü önünə gül dəstələri qoyularaq  Ulu Öndərin əziz xatirəsi ehtiramla yad edilib. Təhsil ocağının problemləri ilə maraqlanılmış, məktəbə Ümummili Lider Heydər Əliyevin adının verilməsinin yaxın gələcəkdə baş tutacaq 10 illik yubileyi ilə bağlı təşkilati məsələlər müzakirə edilib.
Daha sonra Həştərxan vilayəti Administrasiyasında nümayəndə heyətinin Həştərxan vilayətinin Qubernatoru İqor Yuryeviç Babuşkinlə görüşü olub.

Görüşdə Həştərxav Vilayəti Hökümət sədrinin müavini K.Xadikov, Həştərxan vilayətinin Beynəlxalq Əlaqələr Agentliyinin rəhbəri V.Qolovkov, Həştərxan İş Mərkəzinin təsisçisi İ.Mirişov iştirak ediblər. Görüş zamanı ölkələrimiz arasında olan mövcud dostluq münasibətlərindən danışılmış, habelə dövlətimiz tərəfindən Həştərxan şəhərində reallaşdırılmış layihələr qeyd olunub.

Bildirilib ki, Azərbaycan dövləti və Heydər Əliyev Fondu tərəfindən indiyədək vilayətdə görülən genişmiqyaslı işlər Azərbaycan-Rusiya münasibətlərinin inkişafına yüksək töhfədir. Keçirilən işgüzar görüşdə Bakı şəhərində inşası artıq yekunlaşaraq, Rusiyanın Azərbaycanda ilk belə bir nümayəndəliyinin olacağı Həştərxan İş Mərkəzinin açılışına hazırlıq məsələləri barədə də fikir mübadiləsi aparılıb. Həmçinin Həştərxan vilayətinin Sənaye və təbii sərvətlər naziri D.Afanasyev ilə görüş keçirilmiş, sosial-iqtisadi və mədəni əlaqələrin daha da gücləndirilməsi müzakirə olunub. 

Sonra Nərimanov Rayon İcra Hakimiyyətinin başçısı Abdin Fərzəliyev rəsmi səfəri ilə bağlı jurnalistlərə müsahibə verib.