Dekabrın 5-7-də İtaliya Deputatlar Palatasının sədr müavini Ettore Rosatonun rəhbərliyi ilə İtaliyanın aparıcı siyasi qüvvələrinin təmsilçiləri olan deputat və senatorlardan ibarət nümayəndə heyətinin və dekabrın 8-9-da İtaliya Xarici İşlər və Beynəlxalq Əməkdaşlıq Nazirliyinin dövlət katibi Manlio Di Stefanonun Azərbaycana səfərləri İtaliyanın çoxsaylı kütləvi informasiya vasitələrinin geniş diqqət mərkəzində olub.

Unikal.org xəbər verir ki, İtaliyanın İl Giornale, Askanews, Yahoo Notizie, Agenzia Nova, Kmetro0, Polticamente Corretto, Giornale Diplomatico, Comunicazione Inform və sair kimi mətbuat vasitələrində mövzu ilə bağlı dərc olunmuş çoxsaylı yazılarda hər iki nümayəndə heyətinin Azərbaycan Respublikası Prezidenti İlham Əliyev tərəfindən qəbul edildiyi bildirilir və həmin görüşlərdə Azərbaycan dövlətinin başçısının söylədiyi fikirlərə istinad olunur.

Yazılarda, eləcə də nümayəndə heyətlərinin Azərbaycanda səfərdə olarkən keçirdiyi görüşlər və apardığı müzakirələr barədə də məlumatlar verilir.

Məlumatlarda, habelə parlamentarların Gəncə şəhərinə səfər edərək Ermənistanın raket hücumları nəticəsində dağılmış yaşayış məntəqələri ilə tanış olduqları qeyd edilir. Həmçinin hər iki nümayəndə heyətlərinin Ermənistanın hərbi işğalından azad olunmuş Ağdam şəhərinə də etdikləri səfərlərə və orada şahidi olduqları dəhşətli mənzərə ilə bağlı fikirlərinə də yer verilir.

İtaliya Xarici İşlər və Beynəlxalq Əməkdaşlıq Nazirliyinin dövlət katibi Manlio Di Stefano və Deputatlar Platasının vitse-spikeri Ettore Rosato Azərbaycana səfərlərinin yekunları barədə Agenzia Nova və Sputnik İtalia kimi mətbuat orqanlarına münsahibələr verərək, ölkələrimiz arasında yüksək səviyyəli əlaqələrin mövcudluğundan, Ağdam şəhərinə səfərlərində müşahidə etdikləri acınacaqlı mənzərədən danışıb, işğaldan azad olunmuş ərazilərə yenidən həyatın qaytarılması üçün bərpa və inkişaf layihələrində iştirakda İtaliyanın böyük marağının olduğunu bildiriblər.

Dövlət katibi Manlio Di Stefanonun Azərbaycana səfəri ilə bağlı İtaliya Xarici İşlər və Beynəlxalq Əməkdaşlıq Nazirliyinin yaydığı mətbuat açıqlaması da İtaliyanın bir sıra kütləvi informasiya vasitələri tərəfindən də dərc olunub.

Bundan əlavə, parlamentarların və dövlət katibinin Azərbaycana səfərlə bağlı öz sosial şəbəkə profillərində etdiyi çoxsaylı paylaşımlar sosial şəbəkələrdə geniş marağa və müzakirələrə də səbəb olub.